出來社會工作之後，總有唔少同上司或者同事外出工作嘅機會。 

比起坐係OFFICE 表現自己，外出工作又係另一個展現自己修養同商務禮儀嘅機會。 

係日資工司工作，同日本人一齊出差嘅時候就有更加多地雷同NG 位。 

佢地相當重事上下級關係，唔小心一個舉動就會留下失禮印象。 

今次就會同大家講下同日本同事或者上司坐的士嘅時候要注意嘅地方。 

冇小薯自覺 

如果搭的士係一門考試，其實係等車果時經已比緊分。 

同好多其他活動一樣，最好一早係心底入面同行嘅人嘅職位，作為新卒(fresh grad)基本上都係係 食物鏈最底層 資歷較淺嘅職位，截車、截到車之後引導架車嘅時候，梗記要挺身而出，如果要資歷較深嘅人出手，就會好失禮架喇。

截車之後梗記要幫上司拉開車門，同幫佢地將行李放去行李廂，係大家都上哂車之後先好上車。呢啲都係好多職場新鮮人有時會有甩漏嘅地方。 

搞錯上下席 

日本人對坐位都好講究，一齊坐車果陣，記住要留上坐比你嘅上司。 

上坐係一個點嘅概念呢? 

有說法話上坐即係指定空間最入面嘅坐位，因為呢個位置係最安全，視界最好。 

上坐嘅具體位置因應情況會有所不同，會議、坐車、入升降機都會套用得到。而出來社會做過一排嘅日本人(其實好多時大部分亞洲地區都有同樣概念)都對某啲場所嘅上坐順序有嘅定理解。 

搭的士嘅情況來講，司機位後面嘅坐席就係上座喇。 

而2到4人同坐嘅情況之中, 資歷最輕嘅小薯就係坐副駕位喇。 

途中當然要負責交代目的地、留意路面情況、帶路同埋比錢。 

以1為最上坐，4為下坐，2至4人嘅場合可以參考下下面幾場概念圖。 

上下座概念始終都只係有個固有觀念，開門比上司上車果陣可以講: 

奥の席にどうぞ 

如果上司話想坐係出啲，都唔好勉強要逼上坐係上席。有時可能佢果日腳痛或者有其他原因冇坐到上席都話唔定，最緊要當場識得變通! 

比女同事坐係後座中間 

如果有同女同事出差就要千萬留心，要避免比佢坐後坐嘅中間位置。 

商務場合嘅時侯，女同事好多時候都係著裙。如果大家留心留意下香港或者日本嘅後席，可以見到踏腳位中間係有一個拱起嘅位置，朦盛盛要女士坐係呢個位就實在係太唔細心喇!如果係男士嘅各位遇著同架妹同事出差就諗都唔洗諗，OUT 呀! 

所以有其他女同事隨行嘅場合就千萬要小心喇! 

猶豫由邊個埋單 

公務場合搭的士的話呢，坐係副駕嘅小薯就要做好埋單嘅準備。 

而呢4筆錢再細筆(24蚊唔跳錶都好)通常事後都可以CLAIM得返。 

所以記住要隨身帶定現金同小量散銀，到步後就盡快比錢，唔好要上司落車等太耐。 

記得要拎返張單。要果要勞煩到上司，或者經理級人馬去處理埋單找錢呢啲繁瑣事務，有機會令人覺得你辦事能力不足，同埋係好失禮嘅事來。 

有啲特別啲嘅情況，如果係去完公司PARTY呀，飲完酒呀呢啲非正規場合有機會同日本人上司一齊搭的士，大部分情況果位上司都會主動比錢。 

但以小編嘅經驗來計，就到步果下都要象徵式拎一拎個銀包出來，如果擺出一個老奉樣要上司比，可能都會唔小心得罪上司自己唔知。 

而上司見到你拎銀包出來之後，通常都會主動話自己出，唔洗你比。 

而有部份日本人同事同自己分享，因為想收工之後有私人空間，好多事都會避免同上司搭同一架的士。散場果陣會想個理由同上司錯開，就算同上司住係同一邊，都會話自己行另一邊，或者話自己仲有其他野做呀，仲有電話要講，等等，都係比較常見嘅情況。