相信好多人都知日本好多地方都可以參觀，和菓子工場、飲品工場等等，日文漢字就係「見学けんがく」，睇住嚟學，夠曬簡而精。

至於工場見學，最多嘅莫過於酒精飲品嘅工場啦，由近年爆紅嘅日本威士忌、仲有啤酒，唔少得梗係日本清酒啦。今次就帶大家睇吓一間，由日本偏遠嘅深山發跡，馳名海外嘅一間酒藏見學之旅啦。

呢間酒藏嘅位置係喺山口縣一個深山入面，當日我轉左幾次電車，嚟到嘅係一個無人車站，出車站之後乜都無，網站上教學係話由車站要搭的士去工場都要十五鐘，但喺我眼前嘅除左係唏噓，就係一條靜過太空嘅馬路。搵左幾間舖頭，有個伯伯行出嚟問我咩事，我要求唔多，我想搭的士啫，喺日本第一次咁想搭的士。然後，原來呢個地區星期日嘅話只有一架的士，要搭都要等十幾分鐘，等佢走完一轉先可以嚟車我。上到車，我覺得好似返左去阿信的故事咁，架的士，好有昭和風味，好彩，都順利喺見學開始時間之前嚟到工場。

呢度每日都開放工場見學，以我經驗最好揀星期一至六，非常療癒嘅入瓶部門星期日係休息架（同埋的士只有一架）。整個見學行程大約一個鐘，一開始由每日喺酒藏生活嘅員工簡單咁講解一下清酒嘅製作過程，然後帶我地去到製作清酒過程嘅每一個工序嘅工場，親見到一粒粒經過精米步合嘅酒米。成日聽嘅精米步合究竟係咩嚟嘅呢？經過精米機打磨走酒米表面嘅雜質，保留酒米心白部分用嚟製作清酒。每一個工序都由工作人員細心講解，令我哋睇到我哋平時咁簡單咁飲到一支清酒，其實係經過咁多個步驟，由精米、蒸米、發酵期間嘅溫度管理、入樽前嘅試味、消毒等等，一一喺你睇前出現，就係因為我果日係星期日，所以睇唔到最後入樽嘅過程，一個鐘嘅見學，滿滿嘅內容，像極了愛情。

最後，完成整個見學之後，大家可以自由選擇去嘗試一個試酒SET，同一樣嘅酒米，分別精米成45%、39%、23%，再加一杯氣泡清酒。都只係三百円，真係唔飲都對唔住自己啦！平時喺香港飲一杯都幾廿蚊啦。不過大家記住，揸車就唔好飲酒，預左飲酒就坐昭和的士啦。試完酒，再買埋一啲只有工場先有嘅手信，我就坐返昭和的士返去無人車站，完成呢個咁精彩嘅見學之旅。

大家下次有機去日本，都可以參觀一下